Plattdeutsche Nachrichten

De Plattdüütschen Narichten vun'n 24. September 2020

Plattdüütsch Narichten vun'n 24. September 2020, [3:25]

Se verhannelt över Afboo vun Steden bi Airbus

Hamborg – Bi’n Flegerboer Airbus snackt se opstunns över dat Afboen vun Arbeitssteden, wat se plaant. In Hamborg sünd de Böversten un IG-Metall to’n ersten Mal tohoopkamen. De Kunzern hett ankünnigt, rund 5000 Steden in Dütschland to streken. In’n Bremer Wark geiht dat üm 445 Arbeitssteden, bi de Kunzerndochter Premium Aerotec in Noornham üm 1100 Steden. De Gewarkschupp will verhinnern, dat Lüüd gegen ehrn Willen rutsett ward.

Buten-Amt wahrschaut wedder vör Reisen

Berlin – De Bunnesregeern hett noch mehr Städte un Flachs in Europa to Corona-Risikoflachs verklaart. Nu wahrschaut dat Buten-Amt vör nich nödigen Reisen in de franzööschen Flachs Bretagne, Normandie un dat Loiretal. Ok Lissabon, Kopenhagen un Dublin staht op de List, jüst so as Rebeete in Tschechien, Österriek un den Nedderlannen. Reisende, de ut düsse Flachs trüchkamt, mööt sik op Corona testen laten. Reisen, de all bookt sünd, köönt meist ahn Kosten afbestellt weern.

Polizei in Belaruss bruukt Waterkanonen gegen Demonstranten

Minsk – In Belarus sünd wedder Lüüd op de Straat gahn, nu wo Staatsbaas Lukaschenko in’t Amt kamen is. In de Hauptstadt Minsk hebbt een paar dusend Minschen protesteert. De Polizei hett Waterkanons un Tranengas gegen de Lüüd insett. Mehr as 140 Minschen hebbt se faatnahmen. Lukaschenko harr güstern för noch een Amtstied den Eed afleggt – un dat weer nich vördem ankünnigt worrn. De EU kennt sien Wedderwahl nich an un plaant Strafen gegen de Vertreder vun de Regeern in Belaruss.

Strieks to’n Wahrschaun in Neddersassen fangt an

Veern – De Strieks to’n Wahrschaun in’n Staatsdeenst gaht wieter. För vundaag hett de Gewarkschupp ver.di ünner annern all Arbeiters vun de Stadt un den Landkreis Veern opropen, de Arbeit liggen to laten. Dat geiht ok üm de Aller-Werser-Klinik. Ver.di foddert för de Arbeiters ünner annern 4,8 Perzent mehr Geld, tominnst aver 150 Euro mehr in’n Maand. In Bremen ward dat in düsse Week woll keen Laways geven, seggt ver.di.

Nordsee-Arbeiters vör „Jo“ or „Nee“ to Strieks in Bremerhaben

Bremerhaben – De Gewarkschupp Etensaken-Geneten-Gaststäden hett de rund 120 Mitarbeiders vun de Restaurantkeed „Nordsee“ in Bremerhaben för vundaag to’n Urafstimmen opropen. Se schüllt daröver entscheden, of dat to noch mehr Strieks kummt. Dat geiht üm de Plaans vun de Kunzernböversten, de Nordsee-Hauptverwaltung vun Bremerhaben in een annere Stadt to leggen. De Gewarkschupp meent, dat loppt ut Hamborg rut. Buterdem foddert de Gewarkschupp een Sotschaltarifverdrag.

Dat Weer

In den Metadaten das Standdatum noch aktualisieren!Un nu een Blick op dat Weer: an den Bremer Flegerhaben un in Deefholt 14, an de Fischereehabenslüüs in Bremerhaben un op Langeoog sünd dat opstunns 15 Graad. Hüüt kiekt twüschen de Wulkenfelders jümmer mal de Sünn rut, bi köhleren 17 bit 19 Graad. Tokamen Nacht treckt to’n Morrn hen vun Westen her jümmer mehr dicke Wulken mit Regenschuers op. Dat Thermometer sackt op 12 bit 10 Graad. Morrn treckt de Regen an’n Vörmiddag över de Elv af un achterna ward dat fründlicher mit af un an een beten Sünn, bi blots noch 14 bit 15 Graad. Sünnabend mal mehr, mal minner Wulken un dat ward köhl un natt bi 13 bit 15 Graad. De Sünndag sütt jüst so ut bi 14 bit 17 Graad. Dat weern de Nahrichten op platt. Anja Guse hett se tohoopstellt. Op Platt trechtmaakt un vörleest hett se Heidi Jürgens.