Plattdeutsche Nachrichten

De Plattdüütschen Narichten vun'n 25. September 2020

Plattdüütsch Narichten vun'n 25. September 2020, [4:04]

Spahn is gegen Dook för Mund-un-Nees op Steeden för Jan un Alleman

Berlin:  Minister för Gesundheit Spahn is dorgegen en Plicht  intorichten de Mask för Mund un Nees op Steden för Jan un Allemann to drägen. De Minister see in de ARD-Daagsthemen: Ut siene Sicht is dat beter – wenn man de Nee-Infektschoon in de Oogen behollt – regional wat dorgegen to doon. De CDU-Politiker is aver dorför scharper gegen de Lüüd antogahn de sik nich an de Hygieneregeln holen. Spahn meent, dat dat Virus sik in de Hauptsaak bi privaate Fiern utbreet.

Corona-Infektschoon: Mehr as 2100 nee Fäll in Düütschland

Berlin: De Gesundheitsämter  in Düütschland mellen um un bi 2100 nee Coronakranke. De Tahl vun Dode, de mit Corona tosamenhangen, steeg um fofteihn op 9443. Frankriek un Spanien mellen en neen höösten Stand: Na Angaav vun de franzöösch Regerung sünd binnen veeruntwintig Stünnen över 16000 nee Fäll bestimmt wurrn. Spanien is, as eerste EU-Staat, över de Tahl vun 700.000 Corona-Infektschoon, siet dat Corona-Slamassel losgung, överweg.

Fridays för Future: Lüüd de dat Klima wohrt ropen dorto op, weltwiet op de Straat to gahn

Berlin: De Klimaschutz-Aktivisten vun de Freedags för de Tokunft – Akschoonskoppel, hebbt för vundaag dorto opropen op de Straat to gahn. Op de ganzen Welt sünd 3000 Demonstratschoon plaant – dorvun um un bi 400 in Düütschland. Ok in Bremen hebbt se anmellt sik to versammeln. Dat gegenan gahn gegen de Klimabredullje schall gauern in Fohrt kamen, ok dat verlangt de Minschen de dat Klima wohrt. De Lüüd vun Freedags för de Tokunft weren, wieldess dat Corona-Slamassel leep, maandelang man in de Hauptsaak in dat Internet to gange.

Binnenstadt schall schööner weern: Bremerhaven gifft dree Millionen Euro ut

Bremerhaven: De Stadt will dree Millionen Euro för de Binnenstadt utgeven. Dat hett de Stadtverordnetenversammlung beslaten. Mit dat Geld ut de Bremerhaven-Fonds wüllt se dat opfangen, wat na dat Corona-Slamassel för de Koophüüs nakummt. In de tokamen sess Weken wüllt se dorvör en Programm op de Been stellen.

Bayern München hollt wiederen Titel: In´n Supercup harrn se de Nees vörn

Budapest: Rekord-Meister Bayern München hett na de Football Champions League ok den europääschen Supercup hoolt. In dat Endspeel in de ungarsche Hauptstadt Budapest harrn de Bayern gegen den FC Sevilla mit twee to een, na de Extra-Tiet, de Nees vörn. In den Supercup drepen de Winner vun Champions- un Europa League op´nanner. In Budapest gifft dat bannig veel Corona-Kranke. Dorum wurr ok, vun de en or annern Siet, bekriddelt dat dat Speel stattfinnt.

Dat Weer

Un nu kiekt wi op dat Weer: In Bremen, Demorst un Veern hebbt wi opstunns 12 Graad, in Bremerhaven sünd dat 13 Graad. An Vörmiddag hangt de Heven vull Wulken un dat pladdert jümmer mol wedder. An fröhen Namiddag trecken de Wulken denn aver na de Elv hen af. Achteran warrt dat fründlich un de Sünn schient af un an. De Wind weiht flau bet in Maaten, an de Küst ok stark böig vun de süüd- bet süüdwesten Kant. Dat Thermometer kladdert op 15 bet 16 Graad. In de Nacht mol mehr mol minner wulkig un dat blifft meist dröög bi 10 bet köhlige 5 Graad. Morgen is dat eerst fründlich, de Wulken schuven sik denn aver gau för de Sünn un na´n Middag hen un an Namiddag schuert dat, to´n Deel pladdert dat ok kräftig. Dat Thermometer schafft dat denn noch op 14 bet 15 Graad. An Sünndag meist wulkig, af un an regent dat ok bi lurige 17 bet 20 Graad.

Dat weren de Plattdüütschen Narichten. Tohoopstellt vun Peter Behrendt. Op Platt trechtmaakt un vörleest vun Martina Brünjes.