Plattdeutsche Nachrichten

De Plattdüütschen Narichten vun'n 1. Oktober 2020

Plattdüütsch Narichten vun'n 1. Oktober 2020, [4:17]

Nee-Infektionen in Bremen över den Grenzweert

Bremen: De Stadt hett eenen eersten Corona-Grenzweert reten. In de verleeden söven Daag hett dat mehr as 35 Nee-Infektionen op 100.000 Inwohner geven. Dat Robert-Koch-Institut hett in de Nacht den so nömmten „Inzidenz-Weert“ vun 36,4 melld. Af eenen Weert vun 35 schüllt Corona-Regeln scharper maakt warrn. Dorop harrn sik ehrgüstern Bund un Länner fastleggt. Ok för Grootveranstaltungen gellt düsse Weert. För dat Werderspeel an´t Weekenenn un dat open maken vun´t Bremer Feepaak warrd dat nu eng. De Senat will dor hütt middag ja or nee to seggen.

Wietere Wohrschau för reisen Lüüd

Berlin: Düütschland hett, vunwegen de Corona-Infektionstahlen, de so hooch gahn sünd, Belgien un Island as Risikoflachen instuft. Dat Robert-Koch-Institut hett nu ok Wales, Nordirland un Deele vun Grootbritannien op de List sett. In Frankriek kamt de Regionen Pays de la Loire un Burgogne dorto. Dat Buten-Amt hett in´t Internet, noch an´t Avend, een Wohrschau för Belgien, Rumänien un Litauen vermelld.

Rassistischer Chat bi Berliner Polizei

Berlin: Ok bi de Berliner Polizei is nu een Fall vun eenen rassistischen Polizeichat rutkamen. Na Informationen vun dat ARD-Magazin MONITOR hebbt sik in den Chat mehr as 25 Beamte över Johren uttuuscht. Schall so wesen sien, dat de, de dor mitmakt hebbt , Flüchtlinge mit Rotten or mit Lüüd de annere sexuelle Gewalt andot, vergleeken hebbt. Un Neonazis hebbt se as möögliche „Verbündete“ bi linke Demonstrationen nömt. Een, de dat Seggen hett, schall vun den Chat wusst hebben. Man he hett nix dorgegen makt. Berlins Binnensenator Geisel seggt, wenn dat allns so stimmt, denn is dat afslut nich hentonehmen.

Kurdische Sängerin Hozan Cane is wedder free

Istanbul: Na mehr as twee Johren achter Trallen, in de Törkei, is de kölsche Singersch Hozan Cane wedder free. Ehre Afkaatsche seggt to de Düütsche Presse-Agentur, dat Cane ut den Knast in´t westtörkische Edirne rut is. Een Gericht hett den Inspruch vun de Afwehr statt geven, dat de lange Haftstraaf över de Maten is. Man de Singersch draff, as dat schient, nich utreisen. Cane harrn se to mehr as 6 Johren achter Trallen verurdeelt, wiel se eene Terrororganisation tohört hett.

Wedder Lawai för Wohrschau in Bremen

Bremen: Vunwegen den Tarifstriet in´t öffentlichen Deenst roppt de Gewarkschaft verdi hütt de Bremer Lüüd de Reinemakt to´n Lawai för Wohrschau op. De Gewarkschaft will, dat all tohoop an de 300 Mitarbeiders vun ´t Bremer Stadtreinemaken un vun Immobilien Bremen dorbi sünd. Dat bedüd, dat se hütt ok keene Affallammers, de in de Stadt staht, rein makt. Un ok de Kitas un Scholen blifft hütt dreckig. De Gewarkschaft verlangt för de Mitarbeiders in´t öffentlichen Deenst 4,8 Perzent mehr Lohn. De Arbeitgever hett bit nu keenen Vörslag vörleggt.

Dat Weer

Un nu een Blick op dat Weer: in Syke, in Achim un an den Bremer Flegerhaben 13 un an de Fischreehabenslüüs in Bremerhaben sünd dat opstunns 14 Graad. Hüüt wesselt sik de Sünn un de Wulken af. Na Ostfreesland hen, to`n Ollenborger Land un na de Wildeshuser Geest hen meist dicke Wulken. Dor mööt wi to´n Avend hen ok mit Schuers reken, bi 18 bit 20 Graad. Tokamen Nacht treckt veele Wulken mit Regen dör. Von de Ems her lockert dat denn op un dat hört op to pladdern. Westlich vun de Weser kummt hier un dor Nevel op. Dat Thermometer sackt op 11 bit 8 Graad. Morrn fröh eerst noch Nevel. Dor sünd veele Wulken an´t Heven. Man dat blifft meist dröge, bi 18 bit 19 Graad. An Sünnavend is dat jüst so. Dichte Wulken, af un an Regen, bi 17 bit 19 Graad. Dat weern de Nahrichten op platt. Ulrike Müller hett se tohoopstellt. Op Platt trechtmaakt un vörleest hett se Antje Kruppa.