Plattdeutsche Nachrichten

De Plattdüütschen Narichten vun'n 2. Oktober 2020

Plattdüütsch Narichten vun'n 2. Oktober 2020, [3:59]

Trump is Corona-positiv

Washington. US-Präsident Trump hett sick mit dat Corona-Virus anstecken. Tosamen mit sien Fro Melania is de Präsident in Quarantään gahn. Kort vörher harr Trump vermellt, dat sien eng Raatgeverin Hope Hicks positiv op dat Corona Virus test wurr. In een Maand wählen de US-Amerikaner en nejen Präsidenten.

Scheuer wiest Verdacht torüch

Berlin. In den Ünnersökensutschuss vun den Bunnsdag to de PKW-Maut, de nich klappt hett, hett Verkehrsminister Scheuer wichtige Punkte, de em vörsmieten warrt, torüchwiesen. De Bedriever vun den planten Maut-Systeem harrn in´n November vör twee Johren kien Angebott makt, üm den Verdrag to verschuven, see Scheuer. De Bedriever versekern dorgegen, se harrn Scheuer anboden, dat Urdeel vun den europäschen Gerichtshoffs aftotöven un denn dat Afkamen to ünnerteken. Dat Gericht harr de Mautplans later ümsmieten. Nu verlangen de Bedriever 560 Millionen Euro Utgliek för den Schaden.

Senat is besorgt wegen Corona-Verloop

Bremen. Gesundheitssenatorsch Bernhard wohrschaut dorvör, dat de Corona-Infektschoonstahlen in Bremen wieder hooch gahn. Se is bang, dat de Grenzweert för noch mehr Oplagen al tokamen Week schafft warrt, see se bi buten un binnen. An´n tokamen Dingsdag will sick de Senat wedder en Bild vun de Laag maken un viellicht wiedere Oplagen fastleggen, so de Linken-Politikersch. In de Stadt Bremen weern güstern 40 Corona-Neeinfektschonen bekannt wurren. Bremerhaben vermellt kien neje Fallen. In´n Momang sünd in dat Land Bremen 326 Minschen mit dat Corona-Virus krank.

Verdi leggt Kitas in Bremen lahm

Bremen. De Gewarkschaft Verdi hett Bremer Kita-Mitarbeieters to en Warnstreik för en ganzen Dag opropen. Ver.di makt kloor, dat blots enkelte Lüüd bi den Streik mitmaken un dormit för ehrn Kinnergoorn dorbi ween. All Steden blieven open. Neven den Kita-Mitarbeiders gahn vundag ok Mitarbeiders vun de Warkstee Bremen, vun´t Jobcenter un de Universität op de Straat. De Gewarkschaft verlangt för de Mitarbeiders in´n öffentlichen Deenst 4,8 Perzent mehr Geld. De Arbeitgever hebbt bet nu kien Angebott vörleggt. In de Mitt vun´n Oktober schallen de Verhanneln in de negste Runn gahn.

Zech-Plans för Bremer Binnenstadt liggen op Ies

Bremen. Dat Huus vun Galeria Kaufhof in de Bremer Binnenstadt warrt, as dat schient, nich verköfft. De Weser Kurier vermellt, dat Boünnernehmer Kurt Zech in Verhanneln nich mit den Eegnern vun de Kaufhof-Geschäftssteed övereens komen kunn. Dormit liggen de Plans vun Zech för en groden Ümboo vun de Binnensadt eerstmal op Ies. För dat Kaufhof-Huus söken de Eegner nu en nejen Anker-Hüersmann, schrifft de Weser Kurier.

Dat Weer

Un nu een Blick op dat Weer: in Wiesmoor 11, an den Bremer Flegerhaben un an de Fischreehabenslüüs in Bremerhaben 13 un in Wittmund sünd dat opstunns 10 Graad. Hüüt is en Mengels ut dichten Wulken un fründlichen Afsnitten an heven to sehn. Dat blifft wiedgahns dröög. De Wind weiht in Maten un mit starken Böen ut Süüdoost bit Oost. Dat Thermometer wiest en Temperatur vun 18 bit 19 Graad. Tokamen Nacht wiest sick de Heven wesselnd. Dat blifft dröög. De Temperaturen gahn op 11 bit 13 Graad torüch. Morrn fangt dat fründlich an, aver de Heven treckt gau to un af Middag kummt Regen vun´t Ollenborger Münsterland. An´n Avend pladdert dat ok in de Gegend twüschen Weser un Elv bi 18 bit 21 Graad. Sünndag wesseln sick Wulkenfeller un fründliche Afsnitte bi 15 bit 17 Graad af.

Dat weern de Nahrichten op platt. Gerrit Busch hett se tohoopstellt. Op Platt trechtmaakt un vörleest hett se Markus Weise.