Plattdeutsche Nachrichten

De Plattdüütschen Narichten vun'n 6. Oktober 2020

Plattdüütsch Narichten vun'n 6. Oktober 2020, [2:59]

Trump ut’t Krankenhuus rut

Washington: US-Präsident Trump is wedder trüch in’t Witte Huus. Dree Daag lang weer he mit sien Covid-19 in en Krankenhuus ween. Sien Huus-Dokter hett aver kloormaakt: Trump is noch nich dör de Süük dör. Wo lang de Mann krank ween is, dat hebbt se jümmers noch nich seggt.

Senat snackt över högere Corona-Tallen

Bremen: De Senat plaant woll strengere Corona-Regeln in de Hansestadt. Wat se genau vörhebbt, is noch nich rut. Hüüt Vörmiddag will sik de Lannsregerung de frischen Tallen ankieken. In’t Land Bremen sünd opstunns 411 Minschen an Covid-19 krank. Mehr Tallen finnt Se op butenunbinnen.de.

Seehofer mit Bericht över Rechtsextremismus

Berlin: Bunnsbinnenminister Seehofer leggt Klock 11 den „Bericht över de Laag vun Rechtsextremismus in Sekerheitsbehörden“ op den Disch. Dor geiht dat üm de Polizeibehörden vun Bund un Länner un ok üm de Geheemdeensten. In de verleden Weken weer bekannt worrn: Dat gifft en Reeg rassistische oder rechtsextreme Chatkoppels bi de Polizei un den Verfatensschutz.

Morgen: Keen Bus un Bahn bi de BSAG

Bremen: De Gewarkschap Verdi plaant noch en Wohrschaustreik bi den Verkehr vun un na dichtbi. Morgen schall in Bremen noch mal wedder keen Bus un keen Stratenbahn fohren. In Bremerhaven schall aver allens lopen as jümmers. De Gewarkschap Verdi verlangt en neen Tarifverdrag un betere Grundlagen för de Arbeit vun 87.000 Lüüd, de in ganz Düütschland in den ÖPNV arbeiden doot.

Rashica blifft

Bremen: An’t Enn vun de Wesseltiet sünd dat twee Footballers, de vun Werder Bremen weggaht. Davy Claasen geiht na Ajax Amsterdam. Johannes Eggestein lehnt se an den Linzer ASK ut. Milot Rashica aver blifft an de Werser. En Kuntrakt mit Bayer Leverkusen hebbt se nich henkregen.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven, Vechte un op Langeoog överall 13 Graad. Vundaag: Gries. Blots af un an waagt sik de Sünn mal rut. De een oder anner Regenschuer kann aver ok dalkamen. Dat Thermometer krabbelt op 14 bet 15 Graad. De Wind dorto weiht flau oder en beten mehr vun de süüdwesten Kant, an de See ok frisch un op de Inseln mit de een oder anner störmsche Bö. Tokamen Nacht: Mal mehr, mal weniger Wulken. Dat kann ok wedder pladdern, sünnerlich an de Küst. Bi 11 bet 10 Graad. Morgen: Wulken över Wulken, de Sünn pliert dor blots mal so’n beten dör. Mag ween ok mit Blitz un Dunnerslag. Dat Ganze bi 14 bet 15 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Michael Nendza.