Plattdeutsche Nachrichten

De Plattdüütschen Narichten vun'n 07. Oktober 2020

Plattdüütsch Narichten vun'n 7. Oktober 2020, [3:22]

Tahl vun Lüüd de sik mit Corona anstekt stiggt in Bremen stark an

Bremen: Söbentig nee Corona-Infektschoon in Bremen. Bet nu is de Tahl binnen 24 Stünnen noch nie nich so hooch gungen. Över de Grenztahl vun foftig nee Infektschoon op 100.000 Börgerslüüd in ene Week is Bremen aver noch nich över weg. In den Fall seggt de Vörschrift, dat Leven in Bremen för Jan un Allemann wedder in Schranken to wiesen.

Bremerhaven maakt Sporthallen dicht

Bremerhaven: De Stadt maakt ölven Sporthallen för ene Tiet lang dicht. Dor schall eerstmol ünnersöcht warrn, of de Heizungsanlaag dat Coronavirus mehr un mehr utbreet. De Stadt hett bet nu aver keen Henwies dorop, dat sik Lüüd doröver ansteken hebbt. Of dat in Bremen ok maakt warrt, is opstunns noch nich klor.

In Demorst hebbt sik veel Lüüd nich an de Oplagen vunwegen Corona hollt

Demorst. In de Weertshüüs vun de Stadt leep nich allens na Gesetz un Recht, en ganzen Barg hebbt sik nich an de Corona-Oplagen hollt. Polizei, Zoll un de Butendeenst vun de Stadt harrn güstern nakeken of sik all an de Pandemieregeln hollen. Dorbi rutsuert sünd all neeslang hoge Straafafgaven.

Bussen un Bahnen staht still

Bremen: De Verkehr vun un na dichtbi in Bremen fallt vundaag heel un deel ut. Bussen un Bahnen vun de BSAG blievt bet morgen fröh in de Laager. De Gewarkschap Verdi hett de Arbeiters vun Bus- un Bahnünnernehmen in ganz Norddüütschland to en Streik opropen. Se rekent mit um un bi 3500 Lüüd de dor mitmaakt, mit dorbi ok Arbeiters ut Hannover, Göttingen, Goslar un Wolseburch.

5 Dode bi en Unfall op de Autobahn 1

Wildshusen. Fief Minschen sünd bi en Unfall op de Autobahn een bi Wildshusen doot bleven. De Doden sünd poolsche Staatsbörger. All hebbt in en Transporter seten un sünd, as dat utsüht, ahn to bremsen op en Saddelsleper ropkachelt. De Lastwagen wurr, vunwegen en Stau vör ene Bosteed, langsamer.

Dat Weer

Un nu kiekt wi op dat Weer: In Bremen, Bremerhaven un Willemshaven hebbt wi opstunns 12 Graad, in Emden sünd dat 13 Graad. Vundaag seht wi Wulken över Wulken. Af un an sliekert sik aver ok mol de Sünn dör. Dorto pladdert dat jümmer mol wedder, verenkelt kann dat ok Blitz un Dunnerslag geven. De Wind weiht flau bet in Maaten, an de Küst ok mit frischen, starken un stöörmschen Boen vun de südwesten bet westen Kant. Dat Thermometer kladdert op 15 bet 16 Graad. In de Nacht schuert dat noch an de Küst, annerswo rieten de Wulken op un de Regen höört meist ganz op. An fröhen morgen schickt us Ostfreesland wedder mehr Wulken. Dat Thermometer sackt op 11 bet 8 Graad. Morgen sünd de letzten freen Steeden twüschen de Wulken gau dicht. Dat geiht twars dröög los, vun Westen her treckt denn aver Regen op, de ok anhollt un ok mol kräftiger is. Dat Thermometer schafft dat op 13 bet 15 Graad.

Dat weren de plattdüütschen Narichten. Tohopstellt vun Michael Nendza. Op Platt trechtmaakt un vörleest vun Martina Brünjes.