Plattdeutsche Nachrichten

De Plattdüütschen Narichten vun'n 8. Oktober 2020

Plattdüütsch Narichten vun'n 8. Oktober 2020, [3:26]

Bovenschulte seggt: mag ween, un de Corona-Regeln ward scharper

Bremen – Börgermeister Bovenschulte kann sik scharpere Hygiene-Regeln för de Stadt Bremen vörstellen, wiel de Corona-Infektschonstallen jümmer wieter na baben kladdert. Güstern is de Stadt to een Risiko-Rebeet verklaart worrn. Dar kummt nu achterna, dat bi privaten Fiern or Veranstalten för Jan un Allemann dütlich weniger Minschen dar sien dröfft as vördem. Buterdem will dat Land Bremen noch beraden, of in Tokunft Touristen ut Risikoflachs hier noch in Hotels or Ferienwahnungen ünnerkamen köönt.

Tall vun de nee’en Corona-Infektschonen kladdert dütlich na baben

Berlin – De Tall vun de Nee-Infektschonen mit dat Corona-Virus in Dütschland is op mehr as 4.000 binnen een Dag na baben kladdert. Dat sünd 1.200 mehr as güstern. Een högere Tall geev dat toletzt in de erste Aprilweek. Tohoopnahmen hebbt sik in Dütschland bitnu goot 310-dusend Minschen mit dat Corona-Virus ansteken.

Bremer Verkehrsfleger-School verleert twee grode Opdraggever

Bremen – De Verkehrsfleger-School vun de Lufthansa in Bremen verleert ehr letzten beiden groden Opdraggever – dat hett Radio Bremen to weten kregen. Vör allens dat Utbillen vun Bunneswehr-Piloten weer een goder Kurs för de Tokunft, naden de Lufthansa ehr eegen Piloten-Utbillen in Bremen opgeven hett. De Lufthansa hett twars bi dat Bunneswehr-Utschrieven mitmaakt – man blots mit ehr Flegerschool in Rostock, nich mit Bremen. De Lufthansa sülfst will darto nix seggen.

Börgerschupp snackt över Hölp för de Veranstalter

Bremen – De Börgerschupp snackt an’n Vörmiddag över de slechte Laag vun dat Wertschuppsfeld vun de Veranstalter. Dat is mit an’n dullsten vun de Corona-Laag bedrapen. In een dringlichen Andrag snackt sik de Fraktschonen vun SPD, Grönen un Linken för een Födderprogramm ut. Mit dat Geld schüllt de Veranstalter ehr Shows un Spektakels vun de Technik or Boo-Art so verännern, dat dat lichter ward, de Hygiene-Regeln intohollen. Denn köönt ok wedder mehr Tokiekers kamen, de Billjets köfft.

TV-Duell twüschen de Viezkandidaten vör de US-Präsidentsschuppswahl

Salt Lake City – In de eenzig TV-Debatt vun de Viez-Kandidaten vör de US-Präsidentenwahl güng dat meist üm dat Corona-Virus. De Kandidatin vun de Demokraten, Harris, hett US-Präsident Trump vörsmieten, dat he in de Pandemie nich richtig hannelt hett. Viezpräsident Pence hett dat Krisen-Management vun de Trump-Regeern verdeffendeert. Tohoopnahmen weer de Debatt man veel akraater aflopen as de Tweekampf vun Trump un sien Wedderpart Biden, de vör een Week ut de Reeg lopen is.

Dat Weer

Un nu een Blick op dat Weer: an den Bremer Flegerhaben, an de Fischereehabenslüüs in Bremerhaben un in Ossenbrügg 10 un in Cuxhaben sünd dat opstunns 11 Graad. Vundaag regent dat, ok länger un jümmer wedder ok orrig dull. Erst to’n Abend hen treckt de Regen af un de Wulken lockert vun de Nordsee her op – bi 14 bit 15 Graad. Tokamen Nacht is dat erst noch een beten wulkig un later funkelt denn ok mal de Sterns. Dat pladdert nich mehr un dat Thermometer sackt op 10 bit 7 Graad. Morrn ward dat fründlicher, dar schient mal de Sünn un Wulken treckt vörbi. Meist pladdert dat nich, man an de Küst kann mal wat daal kamen – bi13 bit 15 Graad. Sünnabend mal so, mal so mit Sünn, Wulken, Schuers un af un an ok Grummelschuers, bi 10 bit 12 Graad. Dat weern de Nahrichten op platt. Carola Schwirblat hett se tohoopstellt. Op Platt trechtmaakt un vörleest hett se Heidi Jürgens.