Plattdeutsche Nachrichten

De Plattdüütschen Narichten vun'n 9. Oktober 2020

Plattdüütsch Narichten vun'n 9. Oktober 2020, [4:01]

Börgermeister snackt mit Merkel över Corona

Bremen. Börgermeister Bovenschulte, un de Börgermeister van thein annern Grootsteden hollt an´n Middag Raatslag över dat Corona-Slamassel. Na de bannig anstegen Tallen an de verleden Dagen geiht dat vör allen um de Fraag, wo dat Utbreden vun dat Virus in Ruums, wo vele Minschen openanner drapen, ophollen warrt. Vör de Video-Konferenz see Bovenschulte, he hoopt op en Utspraak vör de richtigen Regeln gegen de weltwiete Süük. Dat de Lüüd nich mehr binnen Düütschland överall hinfohren dörven, warrt mehr un mehr bekriddelt.

Verfatensschutzbaas wohrschaut vör Grull gegen Juden

Berlin. De Präsident vun dat Bunnsamt för Verfatensschutz, Haldenwang, hett vör en „steil hooch gahn vun en Grull gegen Juden“ wohrschaut. In de verleden twee Johren harrn Straafdelikten gegen Juden un jöödsche Inrichtungen in Düütschland bannig tonahmen, see Haldenwang de Berliner „Dagsspegel“. Vör een Johr harr en Rechtsextremist in Halle mit en Terror-Attack en Synagoge angrepen un twee Minschen ümbrochen. För vundaag sünd vele Gedenk-Veranstalten plant.

Bunnsrat stimmt över Kfz-Stüer af

Berlin. De Bunnsrat will vundag över en Reform van de Kfz-Stüer afstimmen. Vun dat tokamen Johr an weern Autos mit hogen Sprietverbruuk mehr Stüern betahlen. Dat schall de Börgerslüüd dorto bringen, spaarsame Wagen to köpen. Al anmellte Autos sünd aver nich bedrapen. De Bunnsdag hett de Reform al besluten. Bavento stimmt de Bunnsrat över en Toschuss för de knapp 2000 Kliniken in Düütschland af. Dree Milliarden Euro schallen de Krankenhüüs kriegen, dormit se Notfallpatschenten beter versorgen könen.

Fredensnobelpries warrt vergeven

Oslo. De Nobelprieskommischoon gift in en halve Stünn bekannt, wer in düsset Johr den Fredensnobelpries kriegt. En kloren Kandidaat, de dat winnt, gift dat nich. Op de Listen vun de Kandidaten stahn mehr as 211 enkelte Lüüd un 107 Organisatschonen. De List is geheem, liekers hebbt vele Opseher al Tippen afgeven. De Weltgesundheitsorganisatschoon WHO warrt faken nöömt, ok de sweedsch Klimaaktivistin Greta Thunberg. Mennig een wett ok op Bunnskanzlersch Angela Merkel.

Trump will wedder in den Wahlkampf instiegen

Washington. Na sien Corona-Infektschoon will US-Präsident Trump vun morgen an wedder Wahlkampf maken. Sien Huusdoktor hett verklort, dat Behanneln vun sien Corona-Infektschoon is afsloten. Trump sien Wahlkampf-Trupp hett verlangt, dat dat tweete TV-Duell doch in en Fernsehstudio utricht warrt. De Lüüd, de dat plant hebbt, harrn lever fastleggt, dat Trump un sien Wedderpart Biden ehr Debatt per Video föhren. Daaruphen hett Trump verklort, he will dor nich mitmaken.

Dat Weer

Un nu een Blick op dat Weer: in Braak, an den Bremer Flegerhaben, an de Fischreehabenslüüs in Bremerhaben un in Demorst sünd dat opstunns 11 Graad. Hüüt stellt sick en fründlichet Weer in. Neven langen Sünnschien trecken woll ok en poor Wulken vörbi un dat blift dröög. An de Küst kann dat den een or anneren lütten Schuer geven. De Wind weiht en beten, an de Küst in Maten ut Süüdwest. Dat Thermometer wiest en Temperatur vun 14 bit 15 Graad. Tokamen Nacht bringen dichte Wulken Regen un hier un dor ok Blitz un Donnerslag. An´n Morgen pladdert dat wieder bi 7 bit 9 Graad. Morrn wesseln sick fründliche un Afnitte un Wulken af. Hier un dor mutt man ok mit korten Schuern reken. Ok Blitz un Donnerslag sünd dorbi. Dat Thermometer wiest 11 bit 12 Graad. Sünndag ännert sick dat Weer nich würklich. Wulken, hier un dor Regen un unstadig bi 12 bit 13 Graad.

Dat weern de Nahrichten op platt. Gerrit Busch hett se tohoopstellt. Op Platt trechtmaakt un vörleest hett se Markus Weise.