Plattdeutsche Nachrichten

De Plattdüütschen Narichten vun'n 13. Oktober 2020

Plattdüütsch Narichten vun'n 13. Oktober 2020, [4:03]

Wieder Striet üm: Nich övernachten

Bremen: Wenn dat üm dat Övernachten vun Minschen ut Risiko-Gegenden geiht, is de Striet nich ut de Welt. Berlin un Nordrhein-Westfalen wüllt de Regeln ümsmieten, un Bremen ok. Börgermester Bovenschulte sä to buten un binnen: So warrt de Städte un Gemeenden een gegen den annern ophisst. Man Mekelnborg-Vörpommern will to’n Bispeel an dat „Nich-Övernachten“ fasthollen. De strengen Regeln harrn vun Anfang an en goden Kurs vörgeven, meen Ministerpräsidentin Schwesig in dat ARD-Morgenmagazin. Morgen snackt Kanzlersch Merkel mit de Ministerpräsidenten över de Corona-Laag.

Corona-Tallen stiegt un stiegt

Berlin: In Düütschland gifft dat wedder mehr Minschen, de sik nee mit Corona ansteken hebbt. Bi dat Robert-Koch-Institut hebbt se in 24 Stünnen 4122 ne’e Kranke tellt. In’t Land Bremen sünd 34 Lüüd dortokamen – all kaamt se ut de Stadt Bremen. As Risiko-Gegenden tellt nu de Stadt Bremen, Demorst un denn de Kreisen Wersermasch, Cloppenborg, Vechte, Emsland un de Grafschap Benthem. In een Week sünd dor vun 100.000 Inwahners mehr as 50 an Corona krank worrn.

Wulf-Verordnung in Neddersassen noch in’n Harvst

Hannover: Neddersassen will noch düssen Harvst en ne’e Wulf-Verordnung rutgeven. Dat sä Ãœmweltminister Lies. Eenfacher schall dat warrn, wenn se en Problemdeert afscheten wüllt. Bet nu mütt in jeden Fall en Extra-Andrag stellt warrn. Nu wüllt se klore Punkten opschrieven, dat en Wulf afschaten warrn kann, wenn he över en Schutztuun weggahn is un Deerten op de Wisch dootmaakt hett. Opstunns gifft dat 300 bet 350 Wülv in Neddersassen. Een Dutz dorvun kunnen as Problem-Wülv dörgahn.

Perzess wegen Bedregeree mit Sozialleistung geiht los

Bremen: Vör dat Landgericht is en Perzess losgahn. Dor geiht dat üm Bedregereen üm Millionen Euro an Sozialleistung in Bremerhaven. Towannerers ut Bulgarien harrn blots to’n Anschien Arbeitsverdrääg kregen. Dat Bremerhavener Jobcenter hett dat en Schaden vun mehr as 6 Millionen Euro inbröcht. De Staatsanwalt smitt den Mann, de vör’t Brett steiht, vör: Dat weer Bedregeree mit anner Lüüd tohoop – 691 mal.

Andrag op en Geboortsurkunn kann in Bremen nu ok online stellt warrn

Bremen: Öllern köönt vun nu op an en Andrag för en Geboortsurkunn för en Kind online stellen. Dat Finanzressort hett künnig maakt: Dat gifft dat anners narrms in Düütschland. Bald köönt Lüüd op düsse Oort ok en Andrag op Kinnergeld un Kinnertoslag stellen. Dat geiht aver blots, wenn Öllern en neen Personalutwies hebbt. Un wenn se na 2001 bi dat Standsamt Bremen heiraat hebbt.

Dat Weer

Un woans süht dat mit dat Weer umto ut? Opstunns hebbt wi in Bremerhaven un Kneten 6 Graad, in Bremen un Rotenborg sünd dat 7 Graad. Vundaag: Mehr un mehr kriggt de Sünn de Bavenhand. Mag ween un dat pieselt ok mal, man normal blifft dat dröög. Dat Thermometer krabbelt op 13 bet 14 Graad. Wenn sik de Daak länger höllt, ok wat koler. De Wind dorto weiht flau vun de süüdoosten Kant, över Dag dreiht he op Noordoost. Tokamen Nacht: Mal mehr, mal weniger Wulken. Laterhen treckt dat dicht. Regen gifft’t aver nich. Gegen Morgen kann Daak opkamen. Bi 9 bet 6 Graad. Morgen treckt Wulkenbargen dör. Wenn sik de fröhe Daak oplööst hett, wiest sik ok kort mal de Sünn. An de Küst lacht se en beten mehr. Dröög. Dat Ganze bi 11 bet 13 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.