Plattdeutsche Nachrichten

De Plattdüütschen Narichten vun'n 23. November 2020

Plattdüütsch Narichten vun'n 23. November 2020, [3:27]

Nich so veel Kinner infizeert, as se dacht harrn

Passau – Dat Risiko, sik in Scholen un Kinnergaarns mit dat Corona-Virus antosteken, is nich so hooch as se dacht harrn. Dat is bi een Ãœnnersöken vun de Tallen vun Kinnerdoktors rutkamen. För de Ãœnnersöken hebbt de Medziner de Daten vun mehr as 110-dusend jungen Minschen, de in’t Krankenhuus weern, ankeken. Dar ward jeder op dat Virus ünnersöökt, ok wenn he keen Symptome hett. Darbi rutkamen is, dat blots 0,5 Perzent vun de Kinner un jungen Lüüd dat Virus in sik harrn. Jüst sowat wiest sik ok in Ãœnnersökungen in annern Lännern.

Corona-Regeln schallt länger duern

Berlin – Bund un Länner wüllt de Corona-Regeln woll länger anduern laten, dat hett de ARD to weten kregen. So steiht dat in een Papeer to’n Besluten för dat Krisendrepen Middeweken. Darnah schall de Deel-„Allens-Op-Null“ tominnst bit to’n 20. Dezember wieter bestahn blieven un noch scharper weern. Se snackt daröver, Drepen vun Lüüd noch mehr een P vörtosetten un dat Silvesterfüürwark to verbeden.

Bunneswiet 11-dusend nee’e Corona-Infektschonen faststellt

Berlin – Dat Robert-Koch-Institut hett an’n Morrn knapp 11-dusend nee’e Corona-Infektschonen mellt. An’n Freedag hebbt se mit mehr as 23-dusend nee’en Infektschonen een nee’en Rekord faststellt. De Tallen sünd to’n Anfang vun een Week aver jümmer niedriger, wiel nich alle Gesundheitsämters an’n Wekenenn Tallen an dat RKI mellt. An’n Mondag verleden Week leeg de Tall ok knapp ünner 11-dusend. In’t Land Bremen geev dat güstern 92 nee’e Fälle, 28 davun in Bremerhaben.

Impfen gegen Corona villicht noch in dütt Johr

Berlin – Bunnesgesundheitsminister Spahn rekent noch in dütt Johr mit dat erste Impfen gegen Corona. So as dat nu utsütt, köönt wi woll toversichtlich sien, dat bit to’n Enn vun’t Johr een Impfstuff in Europa tolaten ward, sä Spahn to dat Redaktschonsnettwark Dütschland. He harr de Bunneslänner beden, bit Midde Dezember de Impfstäden praat to hebben. As Spahn vermellt, hett sik Dütschland mehr as 300 Millionen Impfdosen sekert.

Wahrschaun vör to veel nee’en Schullen

Berlin – De Präsident vun’n Bunnesrekenhoff, Scheller, wahrschaut vör een Neeverschuldung, de ut’n Ruder löppt. He sä to de Rheinische Post, nich all Schulden vun’n Bund sünd dör de Pandemie verursaakt worrn un laat sik dör düsse besünnere Notsituatschon begrünnen. Scheller bekrittelt ok Hölp för de Dütsche Bahn un de Milliardenhölp för dat Auto-Wertschuppsfeld. Wegen de hogen Gewinne stellt sik de Fraag, woso de Industrie den Wessel to dat Elektro-Auto nich sülfst betahlt.

Dat Weer

Un nu een Blick op dat Weer: an den Bremer Flegerhaben un in Bremervöör 6, an de Fischreehabenslüüs in Bremerhaben 7 un op Spiekeroog sünd dat opstunns 10 Graad. Hüüt wesselt sik Sünn un Wulken af, vör allens an de Küst sünd de Wulken ok mal dicker un köönt Schuers bringen. To’n Namiddag un Abend hen ward de Wulken mehr, man de Schangs op Regen ward weniger – bi 9 bit 11 Graad. In de Nacht kann dat erst noch Lücken mang de Wulken geven, later treckt dat aver to. Kann ok Nevel geven. Dat blifft dröög bit op een paar Sprütteregen-Druppen. Dat Thermometer sackt op 5 bit 2 Graad, verenkelt gifft dat Boddenfrost. Morrn sünd meist veele Wulken an’n Heben, ut de dat drüppeln kann – meist blifft dat aver dröög. To’n Namiddag mag dat een beten oprieten un de Sünn kiekt rut, bi 8 bit 9 Graad. Dat weern de Nahrichten op platt. Katrin Martens hett se tohoopstellt. Op Platt trechtmaakt un vörleest hett se Heidi Jürgens.