Plattdeutsche Nachrichten

De Plattdüütschen Narichten vun'n 24. November 2020

Plattdüütsch Narichten vun'n 24. November 2020, [3:17]

Ministerpräsidenten: Strenge Corona-Regeln schüllt länger lopen

Berlin: Dat de strengen Corona-Regeln wiederloopt, dat is teemlich seker. De Top-Lüüd vun de Bunnslänner hebbt güstern Avend afsnackt: Bet to’n 20. Dezember schall dat so wiedergahn. Fastleggen warrt se dat woll morgen bi dat Bund-Länner-Drepen mit Kanzlersch Merkel. Dat lett: Een schall denn mit noch weniger Lüüd tohoopkamen. Man för de Wiehnachtstiet schüllt de Regeln woll nich so streng ween.

Hoge Corona-Tallen överall in Düütschland

Berlin: In Düütschland hebbt sik noch mal üm un bi 13.500 Minschen mit dat Corona-Virus ansteken. Dat sünd so wat dusend weniger as vör een Week. Dat Robert-Koch-Institut hett dat vunmorgen vermellt. För dat Land Bremen gifft de Gesundheitsbehöörd an: 18 Corona-Kranke mehr, 4 dorvun in Bremerhaven.

Toschuss för de egen Oplaad-Statschoon

Berlin: De Bund gifft vun hüüt op an Geld för private Oplaad-Statschonen för Elektroautos. De so’n Wagen fohrt, kann bi de staatliche Förderbank KfW en Andrag op en Toschuss stellen. För een Oplaad-Punkt gifft dat 900 Euro. De mutt aver op jeden Fall mit Ökostroom lopen.

Vagelsüük in den Landkreis Ollenborg ankamen

Ollenborg: In Willshusen hebbt se bi en dode wille Goos Teken för de Vagelsüük funnen. De Landkreis hett de Buern mit Fedderveeh opropen: Se schüllt all de Regeln gegen de Pest inholen. Un: Minschen schüllt nich dicht an wille Vagels rangahn. Dat is nich de eerste Fall in de Region. In en Reeg Landkreise in den Noordwesten dröfft dat Fedderveeh al nich mehr na buten.

Spaaßmaker Karl Dall is doot

Hamborg: De Spaaßmaker un Snacker Karl Dall leevt nich mehr. Ut sien Kontor weer to hören: Güstern is he storven. Karl Dall is 79 Johr oolt worrn. Dat is twee Weken her, dor hett he en Slag kregen, achteran is he nich wedder op de Fööt kamen. Bekannt worrn is he as een vun Insterburg & Co, he hett aver ok schauspelert un siene egen Sendungen in’t Feernsehn hatt.

Dat Weer

Un woans süht dat mit dat Weer umto ut? Opstunns hebbt wi in Bremen, Bremerhaven un Veern 7 Graad, op Langeoog sünd dat 8 Graad. Vundaag: Vele Wulken, un de köönt ok mal en poor Regendruppen op uns daalsmieten. Meisttiets aver blifft dat dröög. Jüst in Bremen aver un na de Aller to kann dat an’n Namiddag ok wat heller warrn, un hier kann de Sünn denn ok een bet dree Stünnen schienen. Dat Thermometer krabbelt op 9 bet 10 Graad. De Wind dorto weiht flau oder en beten mehr vun de süüdwesten bet süden Kant, an de See ok mit starke Böen. Tokamen Nacht: Blots en poor Wulken, dröög. Hier oder dor kann ok Daak oder hogen Daak opkamen. Bi 5 bet 2 Graad. Morgen: Wenn sik de Daak oplööst hett: Eerstmal Sünnschien, mag ween ok mit en poor Wulken. Dat blifft still un dröög. Dat Ganze bi 7 bet 9 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.