Plattdeutsche Nachrichten

De Plattdüütschen Narichten vun'n 25. November 2020

Plattdüütsch Narichten vun'n 25. November 2020, [3:32]

Bund un Länner leggt Corona-Kurs fast

Berlin: Bunnskanzlersch Merkel un de Top-Lüüd ut de Länner snackt an’n Namiddag in en Video-Kunferenz över den Corona-Kurs. Fastleggt hebbt se al: De strengen Regeln schüllt op jeden Fall bet to den 20. Dezember wiederlopen. Wo sik jümmers noch so vele Minschen ansteekt, schüllt, dat noch weniger Lüüd tohoopkamen. To Wiehnachten un Silvester schall dat nich ganz so streng togahn.

Robert-Koch-Institut: So vele Corona-Dode as noch nie

Berlin: Dat Robert-Koch-Institut hett vermellt: So veIe Corona-Dode as nu hett dat in Düütschland noch nich geven. An een Dag sünd 410 Corona-Kranke dootbleven. De Gesundheitsbehörden hebbt tellt: 18.633 Minschen hebbt sik nee ansteken – dusend mehr as vör een Week. In Bremen gifft dat 138 Corona-Kranke mehr, 8 dorvun in Bremerhaven.

Nipp un nau henkieken: Bremer Füerwehr

Bremen: Binnensenater Mäurer hett en Fro mit Spezial-Opdrag insett. Se schall Licht bringen in dat, wat an rechte Undöögd bi de Bremer Füerwehr in Gang is. De Richterin un fröhere Binnen-Staatsrätin Buse schall sünnerlich rutfinnen: Gifft dat bi de Füerwehr grundsätzlich en Problem mit Rechtsextremisten un Instellungen gegen Froenslüüd? Un: Hebbt de, de dor dat Seggen hebbt, dat womööglich ünner’n Teppich kehrt. Vörher weer vör Dag kamen: Enige Füerwehrlüüd harrn in Chat-Koppels rechtsradikale Saken, wat gegen Froenslüüd un gegen Homosexuelle uttuuscht.

Ordeel gegen Bremer Paster

Bremen: Dat Bremer Amtsgericht hett den Paster vun de St. Martini-Gemeend afordeelt. För de vörsitten Richtersch steiht fast: In en Eheseminar hett he de Lüüd gegen Homosexuelle opbröcht. Dat Gericht hett fastleggt: De Paster mutt 1.700 Euro Straafgeld betahlen.

Düütsche Bahn: Böös in’t Minus

Frankfort: Dat lett: De Bahn schrifft grote rode Tallen. In de „Frankforter Allgemene Zeitung“ steiht to lesen: Dat Minus düt Johr löppt op 5,6 Euro Milliarden rut. Dat twete Corona-Hooch maakt de Laag noch leger. In Bahnen op lange Touren is in’n Dörsnitt blots een Platz vun fief vergeven, schrifft dat Blatt. En beten beter staht de Regionalbahnen dor. Dor sitt knapp 60 Perzent vun de Lüüd binnen, de se mitnehmen kunnen.

Dat Weer

Un woans süht dat mit dat Weer umto ut? Opstunns hebbt wi in Bremen un Deefholt 3 Graad, in Bremerhaven un Emm sünd dat 4 Graad. Vundaag treckt jümmers mal wedder Wulkenplacken dör, man denn lacht uns ok de Sünn. Dat blifft still un dröög. Dat Thermometer krabbelt op 7 bet 9 Graad. De Wind dorto weiht flau vun de süden Kant, an de See ok en beten mehr. Tokamen Nacht: Eerst blots en poor Wulken. Vun de Noordsee her treckt denn aver dichtere Wulken ran. Hier un dor köönt de gegen Morgen Spütterregen daalsmieten. Bi 7 bet 5 Graad. Morgen: Vele Wulken, af un an kann dat pladdern, an’n Namiddag ritt denn aver de Wulkendeek wedder op, sünnerlich na de See to. Dat Ganze bi 9 bet 11 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.