Plattdeutsche Nachrichten

De Plattdüütschen Narichten vun'n 31. Dezember 2020

Plattdüütsch Narichten vun'n 31. Dezember 2020, [2:55]

Oberhuus seggt „Jo“ to Brexit-Afkamen

London – Dat britische Parlament hett „jo“ to‘n Brexit-Hannelspakt mit de EU seggt. Na dat Ãœnnerhuus hett ok dat Oberhuus in London tostimmt. Dat Afkamen weer na langet Verhanneln an’n Hilligen Abend twüschen de EU un Grootbritannien vereenbart worrn. Dat Afkamen gellt nu aver blots för een Övergang, wiel dat Europaparlament dat noch afnicken mutt.

Merkel meent: Corona-Pandemie is een Johrhunnert-Opgaav

Berlin – Bunneskanzlerin Merkel hett för de Börger wieter Lasten dör de Corona-Laag ankünnigt. De Winter is un blifft hart, seggt Merkel in ehr Neejohrsanspraak. De Corona-Pandemie is een politische, sotschale un ökonomische Johrhunnertopgaav. Mit Blick op dat Impfen hett Merkel üm Geduld un Utduer beden.

Bovenschulte: Minschen schüllt sik wieter an Corona-Regeln hollen

Bremen – Börgermeister Bovenschulte hett darto opropen, in’n Kampf gegen de Corona-Pandemie wieter nich so vele Minschen to drepen. Also beter nich Reisen, wenn dat nich nödig is un nich fiern, sä Bovenschulte in sien Neejohrsanspraak. Dat gellt tominnst so lange, bit de mehrsten Minschen nich impft sünd.

Krankenhuus-Sellschupp foddert längeren Lockdown

Berlin – De Dütsche Krankenhuus-Sellschupp hett foddert, dat de Lockdown länger duern schall, sä Verbandspräsident Gaß to dat Redaktschonsnettwark Dütschland. De Krankenhüüs hebbt anners veel to veel to daan, sä Gaß. In de Kliniken ward jümmer mehr Minschen inlevert, de Covid-19 hebbt.

Se söökt wieter Minschen na Eerrutsch in Norwegen

Oslo – Naden de Eer in’n Süden vun Norwegen wegrutscht is, söökt se wieter noch Minschen. As de Polizei vermellt, weet se nich, wo tein Lüüd afbleven sünd, darunner een paar Kinner. Hölpslüüd harrn güstern üm un bi 700 Bewohner in Sekerheit bröcht. Söß Versehrte sünd in een Krankenhuus kamen. Later an’n Dag sünd noch mehr Hüüs afstörrt. Middewiel treckt sik een 700 Meter langer un 300 Meter breder Riss dör den Oort – woso, weet noch nümms.

Dat Weer

Un nu een Blick op dat Weer: in Ossenbrügg 2, an den Bremer Flegerhaben, an de Fischereehabenslüüs in Bremerhaben un in Cuxhaben sünd dat opstunns 3 Graad. Hüüt, an Silvester, sünd meist vele Wulken an’n Heben, man af un an riet dat op un de Sünn kann ok mal rutkieken. Dat kann mal pieseln, anners blifft dat faken dröög bi 4 bit 5 Graad. Tokamen Nacht is dat wieter meist dröög un blangen velen Wulken kann dat ok mal oplockern. An de Küst kann dat ok mal Schuer geven un Nevel kann darbi ween. Dat Thermometer sackt op plus 1 bit minus 1 Graad. Dat kann glatt weern. Freedag, an’n Neejohrsdag, is dat Weer gries or dat is wulkenduster. Af un an kann Sprütteregen or Grisselgrussel fallen. An de Küst kann ok kort mal de Sünn rutkieken, bi 2 bit 4 Graad.  Dat weern de Nahrichten op platt. Ulrike Müller hett se tohoopstellt. Op Platt trechtmaakt un vörleest hett se Heidi Jürgens.