Plattdeutsche Nachrichten

De Plattdüütschen Narichten vun'n 4. Januar 2021

Plattdüütsch Narichten vun'n 04. Januar 2021, [3:28]

Karliczek: keen Präsenzünnericht för all

Berlin: Ministerin för Bilden Karliczek geiht nich dorvun ut, dat dat för all Schölers wedder flink Präsenzünnerricht geven kann. Dat kann man sik vunwegen de Infektionstallen opstunns nich vörtostellen, seggt se to de Funke Mediengrupp. De CDU-Politikerin will, dat de jüngeren Kinner vör allen wedder mit den Ünnericht anfangt. De Kultusminister vun de Länner besnackt sik hütt doröver, wat de Scholen na den 10. Januar wieter dicht blieven schüllt or nich.

Spahn roppt Mediziner un Pleger to Corona-Sprütt geven op

Berlin: Bunnsgesundheitsminister Spahn hett Mediziner un Pleger opropen sik gegen Corona impfen to laten. To de „Rheinischen Post“ hett he dat Sprütt geven gegen Corona as een Gebot vun de Vernunft un Tohoopstahn as Schutz för sik un annere betekend. He sülvst will sik so flink as dat geiht impfen laten, wenn he denn an de Reeg is. Jüst nu warrd in Krankenhüüs un Heime impft. Ok Minschen över 80 schüllt in de erste Grupp de Sprütt kriegen.

"Seute Deern" warrd afwrackt

Bremerhaben: Dat Traditschoons-Seilschipp „Seute Deern“ schall nu afwrackt warrn. Hütt richt se de Bosteed dorför in. Dat rünnerkamen Schipp liggt siet März, vun´t letze Johr, in´t Museumshaben op een Sandbett. Vunwegen so veel giftigen Kraam in un an de „Seute Deern“ is dat Afwracken mit veel Arbeit verbunnen. Dat schall allns bit to´n Enn vun Juni duern. De Kosten för´t Afwracken legt bi rund 3 Millionen Euro.

Gerry Marsden is doot

Liverpool: De englische Popsinger Gerry Marsden, de mit „You`ll never walk alone“ eenen Nummer-1-Hit harr, is doot. Na Angaaven vun siene Familie is he in´t Öller vun 78 Johren, na eene Infektion, inslapen. Marsden is Singer in de Band  “Gerry and the Peacemakers“ ut Liverpool wesen. 1963 Stünn he mit “You`ll never walk alone” för Weeken an de Spitz vun de britischen Charts. De Song is denn to de Hymne vun den Footballclub Liverpool FC wurrn.

Price is nee`e Darts-Weltmeister

London: De Brite Gerwyn Price is de nee`e Darts-Weltmeister. De 35-jöhrige Waliser hett an´t Avend dat Endspeel gegen den Schotten Gary Anderson mit 7:3 wunnen. De Ex-Rugby-Profi kriggt een Priesgeld vun 500.000 Pund un is nu ok an de Spitz vun de Weltranglist.

Dat Weer

Un nu een Blick op dat Weer: an de Fischreehabenslüüs in Bremerhaben un op Spiekeroog 2, an den Bremer Flegerhaben 3 un in Verrn sünd dat opstunns 4 Graad. Hüüt hebbt wi veele Wulken an´t Heven, hier un dor lichte Regen or Spütterregen. An de Nordsee blifft dat ok mal länger dröge un de Sünn kummt mal dör, bi 3 bit 4 Graad. Tokamen Nacht wedder dichte Wulken un dor kummt wedder Spütterregen or Sneeregen rünner. Dat Thermometer sackt op 2 bit 1 Graad. Morrn is dat jüst so bedeckt an´t Heven. Un dor kummt wedder Natt vun baven rünner, bi 2 bit 3 Graad. An Middeweeken veele Wulken, de Sünn kummt hier un dor mal dör. Dat kann Sneeregen or Snee geven, bi 1 bit 3 Graad. Dat weern de Nahrichten op platt. Ulrike Müller hett se tohoopstellt. Op Platt trechtmaakt un vörleest hett se Antje Kruppa.