Plattdeutsche Nachrichten

De Plattdüütschen Narichten vun'n 5. Januar 2021

Plattdüütsch Narichten vun'n 05. Januar 2021, [3:47]

Bund un Länner: Schall noch länger allens op Null?

Berlin: Bund un Länner snackt vun Middag op an doröver, wat noch länger allens op Null blieven schall. Dat lett: Wat nu gellt, dat schall bet to den 31. Januar wiederlopen. Dat vermellt dat Redakschoonsnettwark Düütschland, un de weet dat vun en Vörlagen-Papeer ut Hessen. Noch is nich kloor, woans dat an de Scholen un Kitas wiedergahn schall. Mag ween, un dat gifft ok strengere Regeln.

Biontech: Dat twete Impfen nich rutschuven

Mainz: Dat Pharma-Ünnernehmen Biontech seggt: Dat is keen goden Vörslag, dat twete Impfen ruttoschuven. Se köönt nich seggen, wat dat Serum länger as dree Weken ansleit, wenn dat blots eenmal geven warrrt. Eerst mit de twete Sprütt kann een seker ween. Wo dat Impfmiddel so knapp is, harr Gesundheitsminister Spahn bi de Impfkommischoon anfraagt, wat se den tweten Törn nich rutschuven kunnen.

Bremen: Nich mehr ganz so vele Lüüd ahn Arbeit

Bremen: In’n Dezember-Maand harrn nich mehr so vele Lüüd keen Arbeit. Dat sünd nu 11,1 Perzent. Tosamen harrn in Bremen un Bremerhaven knapp 41.000 Lüüd keen Job. Dat seggt noch nix ut över dat, wat mit dat Allens-op-Null vun nu tosamenhangt. De Arbeitsagentur seggt: Dat warrt denn eerst de Tallen för Januar utwiesen. In Neddersassen hebbt se knapp 1 Perzent mehr Lüüd ahn Arbeit tellt. De Arbeitsagentur seggt: För de Johrstiet is dat normal. Vergleken mit Anfang 2020 hebbt aver veel mehr Lüüd keen Arbeit, un dat gifft weniger fre’e Steden.

Noch strengere Regeln in England un Schottland

London: Wo sik de ne’e Virus-Typ mehr un mehr utbreedt, hett de britsche Regerung noch mal strengere Corona-Regeln in Gang sett. Premierminister Johnson hett kloormaakt: Vun morgen op an maakt se de Scholen dicht, un de Lüüd dröfft nich mehr rut. De Arbeit schall, wenn’t jichtens geiht, in’t Kontor to Huus maakt warrn. In Schottland gellt düsse Oort strenge Regeln al vundaag. Wat dor achter stickt: De ne’e Corona-Virus-Typ, mit den een sik noch veel gauer ansteken kann as mit den olen Typ.

Wetenschaftlers ünnersöökt Mikroorganismen ut de Deepsee

Emm: Dat düütsche Forschungsschipp „Sonne“ is güstern Avend vun en Atlantiktörn trüchkamen. De Forschers hebbt en Barg Plastikmüll opsammelt, un dat bet 4 Kilometer deep. Op vele lütte Plastikstücken hebbt Mikroorganismen ut de Deepsee seten. De Forschers seggt: De hebbt woll lehrt, dat se mit oder sogor vun dat Plastik leevt. Woans de Mikroorganismen dat maakt, dat wüllt de Wetenschaftlers nu in’t Labor rutfinnen.

Dat Weer

Un woans süht dat mit dat Weer umto ut? Opstunns hebbt wi in Emm 2 Graad, in Bremen, Bremerhaven un Rotenborg sünd dat 3 Graad. Vundaag: Wulken an‘n Heven, un dat kann ok mal Spütterregen oder Sneeregen daalkamen. Later an’n Namiddag denn wat dröger, man de Sünn kriegt wi meist gor nich to sehn. Dat Thermometer krabbelt op 3 bet 4 Graad. De Wind dorto weiht flau oder en beten mehr, an de See ok frisch, vun de noordoosten Kant. Tokamen Nacht: Jümmers noch Wulken över Wulken. Eerst noch dröög, gegen Morgen treckt aver vun Oosten her Sneeregen un Snee op. Bi 2 Graad över bet 1 Graad ünner Null. Wohrschau: Dat kann glatt warrn. Morgen: Vele Wulken, un de bringt ok Sneeregen oder Snee mit. Dat Ganze bi natt-kole 1 bet 2 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.