Plattdeutsche Nachrichten

De Plattdüütschen Narichten vun'n 06. Januar 2021

Plattdüütsch Narichten vun'n 06. Januar 2021, [3:26]

Bund un Länner: Noch strengere Corona-Regeln

Berlin: Bund un Länner hebbt fastleggt: Wat nu an Corona-Regeln gellt, dat löppt bet to den 31. Januar wieder. Tohoopkamen kann man blots noch mit een Minsch, de nich to den egen Huusholt tohören deit. Woneem de Corona-Weert böös hooch is, mit mehr as 200 vun 100.000 Lüüd in 7 Daag, dröfft sik de Minschen nich wiet weg bewegen.

Öllern bestimmt in Bremen: Na School oder nich

Bremen: Wenn de Ferien vörbi sünd, schüllt in Bremen un Bremerhaven de Öllern sülvst fastleggen, wat se jümehr Kinner na de School oder Kita henschickt oder nich. Dat sä Börgermester Bovenschulte vunmorgen op Bremen een. De Schoolplicht gellt nich, dat weer ok al vör de Sommerferien so. Öllern, de to Huus op jümehr Kinner oppasst, kriegt 10 Daag Kinnerkrankengeld bavento, för de, de jümehr Kinner alleen optreckt, sünd dat 20 Daag.

Bremen: Blots wenige Olenplegers wüllt sik impfen laten

Bremen: Dat lett: Vun de Olenplegers in Bremen wüllt sik blots wenige impfen laten. De Pleeg-Direktorin vun de Bremer Heimstiftung meent, dor warrt woll nich mehr as 40 Perzent vun de Mitarbeiders mitmaken. Vun de Lüüd, de pleegt warrt, wüllt sik de meisten impfen laten. De Gesundheitsbehöörd will nu de Plegers mit en Akschoon övertügen.

Wahl un Georgia: Wokeen kriggt in den Senat de Bavenhand?

Atlanta: De Demokraten vun den tokamen US-Präsident Biden kunnen ok noch in den Senat de Bavenhand kriegen. Mehrere Medien vermellt: Bi de Wahl een gegen een in den Bunnsstaat Georgia hett woll de demokraatsche Kandidaat Warnock knapp gegen de Nu-Noch-Senatersch Loeffler vun de Republikaners wunnen. Schull dat so ween, hangt allens vun de twete Wahl een gegen een af. Noch sünd se an’t Uttellen.

Bremerhaven: Polizei söcht Unfall-Fohrer

Bremerhaven: Wo dat güstern Avend op de A 27 en Unfall geven hett, söcht de Polizei den Fohrer. De Mann weer in de Utfohrt Wulsdörp mit en Auto dör de Siedenplank fohrt un en Anbarg daal rüüscht. Ehrdat de Polizei an de Unfallsteed ankamen is, weer de Fohrer utneiht. 1400 Euro hett he in den Wagen liggenlaten. Dat Nummernschild vun den Wagen weer namaakt.

Dat Weer

Un woans süht dat mit dat Weer umto ut? Opstunns hebbt wi in Staad 1 Graad, in Bremen un Bremerhaven sünd dat 2 un op Spiekeroog 3 Graad. Vundaag: Nix as Wulken, un ut de kann ok mal Regen, Sneeregen un hier un dor ok Snee daalkamen. An de Küst blifft dat bi Regen. Na dat Emsland to un in Oostfreesland bet Middag dröög. Den Heven kriegt wi meist gor nich to sehn. Dat Thermometer krabbelt op 2 bet 3 Graad. De Wind dorto weiht flau, an de See ok frisch, vun de noorden bet noordwesten Kant. Tokamen Nacht: Jümmers noch Wulken över Wulken. Dat kann ok Sneeregen un Snee geven. Bi 2 Graad över 0 bet 0 Graad. Wohrschau: Dat kann glatt warrn. Morgen: Wulken, un ok wedder mit Snee oder Sneeregen. Dat Ganze bi natt-kole 2 bet 3 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.