Plattdeutsche Nachrichten

De Plattdüütschen Narichten vun'n 13. Januar 2021

Plattdüütsch Narichten vun'n 13. Januar 2021, [4:22]

Spahn lehnt Impfplicht för Pleger klor af

Berlin: De Debatt üm ene Impfplicht för Plegers riet nich af. Gesundheitsminister Spahn is klor gegen den Vörslag vun Bayerns Ministerpräsident Söder. Dat warrt in düsse weltwiede Süük keen Impfplicht geven, see he an Morgen in den Düütschlandfunk. Ok Justizministersch Lambrecht see in de Rheinischen Post „Nee“ dorto, Arbeiders in de Pleeg en Sprütt gegen dat Virus vörtoschrieven. Nordrhein-Westfalens Ministerpräsident Laschet meent dorgegen aver, man mutt doröver snacken. Um dat Thema „Sprütt gegen Corona“ geiht dat vundaag ok in den Bunnsdag. Spahn warrt dorto hüüt Middag en Regerungs-Verkloren afgeven.

Düütschland maakt de Vörschriften för de Inreis ut Länner mit en umkrämpelten Virus leger

Berlin: De Bunnsregerung maakt de Vörschriften för de Inreis ut Länner, ut den en verännert Virus mellt warrt, leger. Dat hett dat Kabinett an Vörmiddag besluten. In Tokunft schall dat nich blots ene Testplicht bi Inreis för Länner mit hoge Infektschoonstahlen geven, man ok för Staaten, in den dat vele Kranke gifft, de sik mit dat umkrempelte Virus ansteken hebbt. Mobilfunknettbedriever schüllt dorto inspannt warrn, Lüüd de inreisen, de Corona-Oplagen, de just gellen, per SMS totoschicken.  

US-Viezpräsident Pence is dorgegen Trump bats op de Steed aftosetten

Washington: US-Viezpräsident Pence warrt Präsident Trump nich bats op de Steed afsetten. Dat is woll nich in´n Sinn för dat Land, steiht in en Schrieven vun Pence an dat Repräsentantenhuus. De Verfatenspunkt um den dat geiht, schall man blots bruukt warrn, wenn dat um de Gesundheit geiht or wenn Kopp un Seel vun den Präsidenten dat Amt nich mehr henkriegt un nich dorför dat he sien Straaf kriggt. De US-Demokraten geven Trump de Schuld doran, dat Lüüd in dat Kapitol rinplatzt sünd un wullen em dorum ut dat Amt rut hebben.

De Bremer Grönen bekriddeln Bogedans Schoolpolitik

Bremen: Süht so ut, as wenn en Striet optreckt binnen de Bremer Regerungskoalitschoon vunwegen de Bildungspolitik wieldess allens op Null sett wurr. De Lannsbaversten vun de Bremer Grönen bekriddeln böös, dat de Schoolen wieder open sünd. Dat Bildungssenatorsche Bogedan all Öllern dorto opropen hett, all Kinner in de School to schicken, is verkehrt, heet dat. De Grönen finnen de Tahlen mit neen Infektschoon veel to hooch, as dat man de Schoolen wedder opmaken künnt. De Bildungssenatorsche wullt nix to den Gegenwind vun de Koalitschoonsmackers seggen.

Mehrere Unfäll dör Ies in Noordwesten

Uthlede: Sneeregen un Glatties hebbt verleden Nacht Schaden op de Straaten in Noordwesten anricht. Op de Autobahn 27 twuschen Cuxhaven un Bremen geevt dat op glatte Fohrbahn mehrere Unfäll. Mit dorbi weren veer Wagen, twee Lüttlaster un een grooten Laster. Minschen sünd nich to Schaden kamen. In den Bereich Weser-Ems mellt de Polizei foftein Ies-Unfäll verleden Nacht. Ok dor weer dat allens nich ganz so slimm. In Bremen un Bremerhaven weer dat ruhig op de Straaten.  

Dat Weer

Un nu kiekt wi op dat Weer: In Ossenbrügge hebbt wi opstunns twee Graad, in Bremen un Bremerhaven sünd dat dree Graad un in Willemshaven hebbt wi veer Graad. Vundaag is dat vun Tiet to Tiet dröög, övern Dag gifft aver jümmer wedder Regen- un Sneeregenschuer, man ok Grisselgrussel kann dorbi ween, de Schuer könnt denn ok mol kräftig utfallen. Af un an mal weniger Wulken un de Sünn kickt denn ok mal vörbi. De Wind weiht in Maaten, an de See frisch, wenn dat schuert, ok stark vun de west bet nordwesten Kant. Dat Thermometer schafft dat op dree bet fief Graad. In de Nacht trecken mal mehr mal weniger Wulken dör, eerst noch Sneeregen or Sneeschuer. Meist is dat aver dröög. Dat Thermometer sackt op köhlige minus een bet minus dree Graad. Morgen blifft dat meist dröög, hier un dor sünd noch Regen- or Sneeschuer mööglich. Dat is mal wulkig, mal dakig, af un an warrn de Wulken weniger. An verscheden Steden schafft de Sünn dat ok mal ruttokieken un dat denn bi een bet dree Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.